Әдетте дрондарымен танымал қытайлық DJI компаниясы енді үй тазалығына арналған смарт-технологиялар бағытын игере бастады. Жақында бренд өздерінің алғашқы робот-шаңсорғышын таныстырып, бұл салада да бәсекелестерге қарсы тұруға дайын екенін көрсетті. Жаңа құрылғыда навигация мен кеңістікті тану жүйелері дрондардан алынған озық технологиялармен толықтырылған.
⠀
Бұл қадам DJI үшін жаңа нарыққа шығудың бастамасы ғана болуы мүмкін.
Өткен айда DJI компаниясының алғашқы робот-шаңсорғышы жайлы сыбыстар тараған еді – ол «Romo» деп аталуы мүмкін. Тіпті, құрылғының суреті де интернетке тарап үлгерді. Бұл оның күткеннен әлдеқайда ертерек таныстырылуы мүмкін екенін аңғартқан.
Енді бұл ақпарат расталғандай болды: DJI ресми түрде Romo робот-шаңсорғышының тизерін жариялады. Тизерде құрылғының өзі көрсетіліп, 2025 жылдың 6 тамызы белгіленген. Бұл – құрылғының ресми тұсаукесер күні болуы әбден мүмкін.
Айта кету керек, тизер әзірге тек Қытайдағы әлеуметтік желілер мен DJI-дің қытайлық сайтында жарияланды. Бұл Romo алдымен тек Қытай нарығында сатылуы ықтимал екенін білдіреді. Кей тұтынушылар үшін бұл көңіл түсірерлік жаңалық болуы мүмкін, бірақ мұндай қадам технологиялық компаниялар үшін қалыпты жағдай.
